Ég varð

ótrúlega hissa þegar ég fór á fætur í bítið á sunnudagsmorguninn og aðalfyrirsögnin á textavarpinu var...
HEIMILISOFBELDI: NÝJAR VERKLAGSREGLUR

Raunveruleikurinn

hans Ómars, sem er svona netleikur, hlaut fyrstu verðlaun í samkeppni um námsefni í neytendamálum sem Norræna ráðherranefndin efndi til. Ómar fékk í verðlaun eitthvað í kringum eina milljón og er það ekki of mikið fyrir hans miklu snilligáfu.
Glæsilegt Ómsi beib.

Nú er áratugur

síðan ég fór að moka snjó á Flateyri. Lífsreynsla sem mótar mann um alla tíð.

Sjónvarpið

Ég lofaði sjálfum mér því fyrir nokkru síðan að minnka sjónvarpsglápið, enda sjónvarp einhver mesti óvinur frjórrar hugsunar. En það er eins og með svo margt annað sem maður ætlar sér það rennur út á hina víðáttumikklu þekju um leið og slakað er á. Ég hef sjálfsagt líka ákveðið einhverntíman að vera ekki að fjargviðrast hér um sjónvarpið en skíttlabenhaben.
Ég er náttúrulega eins og allir óendanlega sorgmæddur yfir því að Skjár einn skuli vera að endurgera ameríska rauntímaþætti. Rauntímaþættir eru illa unnið sjónvarpsefni með ómenntuðum leikurum að leika sjálfa sig í óraunverulegum aðstæðum hverskonar. Keyrir náttúrulega um þverbak þegar ekki er haft fyrir því að hafa íslenskt heiti á metnaðarleysinu.
Menn og konur keppa á ýmsum vígstöðvum í úrkynjun, ómenningu og hóreríi í þeirri von að hreppa ást og hamingju til dauðadags, eða í það minnsta smá pening og ferð til útlanda. Á sama tíma á sömu stöð er Sirrý að gera spjallþætti um siðferðislega hnignun ungs fólks og þá hörmung að afbakaðar kynlífsathafnir skuli vera snar þáttur í skemmtannalífi og jafnvel lykillinn að félagslegri viðurkenningu.
Stóru stöðvarnar keppast um skipta á milli sín kynþokkafullu fólki í þeirri veiku von að gera megi fréttaskýringar að spennandi sjónvarpsefni. Það hefur hins vegar engin breyting orðið á efnistökum, Kastljósið er enn jafn hrútleiðinlegt og Ísland í dag jafn ógeðslega yfirborðslegt og óáreiðanlegt í efnistökum sínum og stórar auglýsingar og kynningarefni á herlegheitunum innantómt skrum og jaðra við lygi.
Eins má fara ófögrum orðum um veðurfréttir. Veðurfréttir eiga að vera til gagns og eru snar þáttur í almannaheill og öryggi borgaranna. Það er því ábyrgðarhlutur að gera veðurfréttir að sjónvarpsefni þar sem umbúðir yfirgnæfa innihaldið.
Ég ætla að sleppa því að segja frá því hvað fasteignaþátturinn á Skjá einum fer svo mikið í taugarnar á mér að mig langar mest til að stinga vísifingri vinstri handar inn í gegnum augað á mér, inn í heila og hræra hraustlega.

Stéphanos

Nafnið mitt er víst komið úr grísku og þýðir kóróna. Alltaf batnar það, ekki bara að ég sé að verða holgóma af leiðindum eftir daglangar fundarsetur, heldur heitir maður einhverju kynvilltu prinsessunafni í þokkabót.

Ég er í fýlu

af því að bæjaryfirvöld á Akureyri virðast ætla að komast upp með valdníðslu áratugarins og lækka laun starfsmanna sinna. Það er eins gott fyrir Kristján Þór og kompaní að fara að leita sér að nýrri vinnu því nú verða hanskarnir teknir niður og sjálfstæðisflokkurinn tekinn í bóndabeygju af herðabreiðum garðyrkjumanni. Fylgist með lesendur góðir (báðir á ég við)

Haust skal það vera

og það snjóar í takt við tímann

Haust eða vetur ?

Ja maður spyr sig á þesum síðustu og verstu. Í morgun hneigði allur gróður sig fyrir Vetri konungi og víða mátti sjá brotnar greinar sem kikknað höfðu undan ægihjálmi hans.