Plat vikunar

Rás 2 heldur úti dagskrárlið sem kallast plata vikunar. Þarna geta útgefendur komið plötum sínum á framfæri, sem er náttúrulega hið besta mál ef smærri útgáfur og einkaframtak stija við sama borð og hinir stærri. Ég ætla nú að sleppa því að vera með dylgjur í einhverjar áttir um það mál. Hins vegar er mál til komið að einhver stöðvi þessa eilífu flóðmigu undir plötu Sigur Rósar ,,takk" Það er kominn tími til að menn hafi kjark til þess að segja að Sigur Rós er einhver alleiðinlegasta hljómsveit Íslands. Ámátlegt aumingjavæl söngvarans yfir ofútsetta leiðinda nútímaklassík þar sem heiðarleg rokkhljóðfæri eru dregin til dauða í einsleitri þunglyndismykju. Það var þó skárra á síðustu plötu þar sem henn sleppti því að syngja á mannamáli og ekki var bætt ofaná vesældina skæli og tannagnístri yfir sjálfsögðum skakkaföllum í uppvexti nútímamannsins. Ég hef sjaldan verið eins feginn föstudegi eins og þeim sem boðaði endalok þessarar hörmungar sem plötu vikunar. Af erlendum plötum er úrvalið oft á tíðum lítt skára og best að ég lýsi því yfir í leiðinni að Oasis er að mínu mati ofmetnasta popphljómsveit sögunar. Þeir eru hundleiðinlegir.

Alltaf í boltanum

Varð þess heiðurs aðnjótandi að fá að spila með Norðurbandalaginu á laugardagskvöldið, þegar ég leysti Finn af. Alltaf hressandi að spila með Halla Gulla, enda sennilega einn besti trommari norðurlanda. Krefjandi að spila lög sem maður kann svona næstum því og hefur ekki æft lengi, en reddast svona á balli.

Þróunaraðstoð ??

Ekki dettur mér í hug að gefa penninga til aðstoðar bandaríkjamönnum. Þó svo ég finni sárt til með þeim sem lentu í Katrínu og hafa týnt öllu sínu, veraldlegu jafnt sem ástvinum. Mér finnst bara svo yfirgengilegt að þessi ríkasta þjóð í heimi (langríkasta by the way) geti ekki séð sóma sinn í því að bjarga þessu fólki. Það tæki herinn þeirra ekki nema dagpart að rýma svæðið ef eitthvað er að marka framgang hans á erlendri grundu og lýsir kannski best hugsanagangi þarlendra stjórnvalda að einfaldast sé bara að skjóta þá sem í örvæntingu sinni gerast brotlegir við lög til þess að halda lífi í sér og sínum.

Gospel

Well, æfingar hjá Gospelkór Akureyrar hefjast aftur í kvöld. Það er náttúrulega tilhlökkunarefni að fá að lemjast með bassann á vömbinni þvers og kruss í eðaldiskofönkglussa sem þetta gospel nú er. Annars er það helst tíðinda að undirleikshljómsveitinni hefur bæst gítarleikari, sem er Halli fyrrum sambýlismaður minn frá í Finnlandi í sumar. Nu fer að verða messufært!!
Eins eru í býgerð U2 tribute tónleikar á Greæna Hattinum um miðjan okt. og eins gott að fara að hysja upp um sig.

Eipsjitt

Einverntíman þegar við Tryggvi bróðir stóðum í ritdeilum á netinu ( man nú ekki alveg hvað við vorum að rífast um, sem er merki um að mér hafi ekki þótt það mikilvægt því ég er maður langrækinn) nefndi hann að ég hefði ,,eipshittað" algerlega. Ég man að mér þótti talað niður til mín og hálf þótti við hann að vera að gera sig breiðan með útlensku yfirlæti. ( fyrir utan þá staðreynd að ég vissi á þeim tíma ekki hvað það var að eipshitta og Tryggvi þurfti að segja mér það) Síðan jafnaði þessi deila sig og ég hef nú tiltölulega nýverið uppgötvað nauðsyn þess að eipshitta reglulega ti þess að halda sönsum. Sögnin að eipshitta þýðir að fara fram úr sjálfum sér í æsingi og missi sjónar á rökum í umræðuefninu og mun vera dregin af ensaka orðinu apeshit. Því miður hef ég ekki verið nógu duglegur að gera það hér á blogginu mínu og oftar en ekki hefur Ragna mín orðið að gjalda fyrir það þegar hugsanatengsl og brengl riðst útúr mér í þessum síðasta svefndrukkna andardrætti hvers dags, þegar maður ætti að vera að mæra spúsu sína og hafa ástarjátningar á reiðum höndum. Nei nei, þá er ég að básúna skoðanir mínar á hinum aðskiljanlegustu hlutum allt frá því hvað það er erfitt að vera geðveikur, ömurlegt að hafa ekki efni á því að kaupa sér öll hljóðfærin sem mig langar í, asnalegt að bandaríkjamenn hafi komist upp með að falsa tungllendinguna, vitlaust að halda því fram að sveitastjórnarmál eigi eitthvað skylt við pólitík, Skrítið að prump skuli safnast fyrir í líkamanum og bíða inni í manni þangað til maður er kominn uppí á kvöldin, merkilegt að bandaríkjamenn skuli ekki virða skoðanir alþjóðasamfélagsins um verndun umhverfisins, ásamt spurningum um tilvist Guðs, réttlæti samgöngustefnunar, skynsemina í sameiningu sveitarfélaga við Eyjafjörð, hvort besta skyr í heimi sé búið til á Akureyri og hvort eldri sonur okkar höndli álagið sem fylgir því að byrja í skóla.
Ég hef nú í krafti staðfestu minnar (?????) ákveðið að hætta að krefja sofandi eiginkonu mína um svör við áleitnum álitamálum og leita þeirra hér í einræðu minni. Til að draga hring á fingur þessa ásetnings sítera ég hér í höfuðskád íslenskra stórfyrirtækja: ,, Ragna ég elska þig "

Skrítið

Af hverju ætli megnið af myndafærslunum mínum hafi horfið. Það skyldi þó ekki vera að eitthvert skrímsli ætti heima á neitnu og nærist á minningum fólks.
- Síðan tekur það sér bólfestu í brjálæðislega fallegum sjúklingi sem verið hefur í dauðadái í átta ár. Hún fer að þylja upp minningabrot og skyssa myndir héðan og þaðan úr heiminum. Trúarofstækismenn og heilabylgjunördar fara að slást um vídeospólur og pappísrarkir. Lífsleiður og áfengismettaður (en samt besti í heimi) einkaspæjari er ráðin af Vatikaninu til þess að komast að uppruna sjúklingsins, sem að sjálfsöðu er óþekkt og herlegheitin enda síðan í gríðarlegu lögfræði og réttardrama þar sem tekist er á við grundvallarspurningar um siðfræði og höfundarrétt og eignarhald á hugsunum.
Hollywood minn rass. Ég er æði.
Hef samt ekki hugmynd um það hvað varð af myndunum.

Alltí Gúddí

Ég er ekkert sérlega vel máli farinn maður. Orðheppinn á stundum í það mesta. Ég hef samt gaman af umræðum og umfjöllun um íslenskt mál. Þar eymir enn af líflegum umræðum í máladeildarbekkjum MA. Í gær voru skilin eftir skilaboð í talhólfinu mínu. Þar kom fram að viðkomandi aðili væri búinn að reyna ítreka að ,, ná á mér" og ,,vildi nauðsynlega" spjalla við mig. ,,Gemsaðu á mig þegar þú getur. Allt í gúddí"
Þú verður að fyrirgefa ef einhver töf verður á því að ég gemsi á þig. Ég hef bara ekki minnstu hugmynd um það hvað það er.